No Nēia Paena

     E ka hoa kuilima o ka manawa, aloha nui ʻoe: ʻo ka lā 5 kēia o ka māhina ʻo Kekemapa i ka makahiki 2018. ʻO ka hola ʻewalu kēia o ke ahiahi, a eia nō hoʻi au, kou mea kākau, ke hoʻokolohua nei i kēia paena kūkaʻi manaʻo Weebly. Hoʻokahi aʻu hoʻāʻo ʻana ma luna o Wordpress; he hoka nō naʻe ka loaʻa i ka nui o ka hālāwai ʻana me nā ālaina i ke ala o ke kūkaʻi manaʻo ʻana. No laila, eia nō hoʻi kekahi hoʻāʻo ʻana ma ka hoʻolana ʻana i kēia waʻa ʻo ka hāpai i ka ʻōlelo aloha o ka ʻāina i luna ma kekahi pōʻaiapili ʻokoʻa aku o ka nohona kanaka he ʻenehana.
     Kapa ʻia kaʻu paena kūkaʻi manaʻo ʻo ʻO Ka ʻŌlelo Hawaiʻi Koʻu Kūʻokoʻa a kapa ʻia kēia pākuʻina kūkaʻi manaʻo ʻo Ahu Kupanaha Iā Hawaiʻi ʻImi Loa. He paena kūkaʻi manaʻo kēia e hoʻolaha ʻia ai nā manaʻo o ka mea kākau nei no nā kumuhana like ʻole e pā ai koʻu naʻau: he nīnūnē kaiaulu ʻoe, he nīnau e moe ʻole ai koʻu pō, a he kumuhana moʻolelo Hawaiʻi kahiko nō hoʻi. He paena pūnaewele kēia e hoʻolaha ʻia ai ka ʻōlelo ma kona ʻano mana nō ʻo ia ka ʻōlelo mana o kēia ʻāina. E like nō hoʻi me ka ʻōlelo e kau aʻela ma luna, "ʻO ka ʻōlelo nō koʻu kūʻokoʻa," ʻo ka ʻōlelo Hawaiʻi nō koʻu ala e kūʻokoʻa ai, a ʻo ka ʻōlelo nō hoʻi koʻu ala e kū ʻokoʻa ai. No laila, e makaʻala mai nō e ka hoa kuilima o ka manawa o hala aku ka Puʻulena i Hilo a holo aku i Papalauahi.