ʻO ka mokupuni ʻo Hawaiʻi ka mokupuni. ʻO ka moku ʻo Hilo ka moku. ʻO Waiākeakumuhonua ke aliʻi ʻaimoku. ʻO Piʻihonuaakalani ke kaukaualiʻi. ʻO Hanakahi ke kaulana ʻāina kaulana. Ma mua o ka wā o Kamehameha Paiʻea, ʻo Kaʻiwakīloumoku kekahi inoa kapakapa ona, ua noho kēia kaulana ʻāina kaulana ʻo Hanakahi kona inoa. He aliʻi nō ʻo Hanakahi. He aliʻi ʻoluʻolu, he aliʻi hoʻomanawanui, a he aliʻi hoʻopono nō hoʻi. 

     ʻOiai, aia ʻo ia ma lalo o ka noho aliʻi ʻana o Waiākeakumuhonua a me Piʻihonuaakalani, ua lawelawe ʻo ia i ko lāua makemake me ka hauʻoli a me ka haʻakei ʻole o kona naʻau. ʻOiai, ʻo Hanakahi ke kaulana ʻāina kaulana o ke aloaliʻi, ʻo kona kuleana ke aʻo ʻana i nā koa wiwoʻole a mākaukau, ka hōʻoia ʻana i ka mākaukau o nā pono kaua ma mua o ka hiki ʻana mai o ka hoapaio, a me ka hōʻoia ʻana i ka hauʻoli o ke aliʻi ʻaimoku ʻo Waiākeakumuhonua.

I kekahi lā, ua hiki mai ʻelua kānaka ʻo Kamiki lāua ʻo Makaʻiole ko lāua mau inoa. He mau keiki hoʻopāpā kēia no Kona Kai ʻŌpua i ka Laʻi. ʻO Kamiki ka hope o Makaʻiole; a ʻo Makaʻiole ka mua o Kamiki; he mau kāʻeʻaʻeʻa kaulana lāua i ko lāua ʻike kupuna. I ko Piʻihonuaakalani lohe ʻana no ko lāua hiki ʻana mai, ua komo ka makemake i loko ona e paio ʻo Hanakahi me lāua. No laila, ua hele ʻo ia i mua o Hanakahi me ka ʻōlelo, “E Hanakahi ē, ua hiki mai he ʻelua kānaka malihini. E hoʻopāpā ʻoe me lāua, no ka mea, ʻo ia ka hana koa kūpono.” Hōʻole ʻo Hanakahi i ka manaʻo o ke aliʻi, no ka mea, ua lohe a ʻike ʻo ia no ke kaulana o kēia mau kāʻeʻaʻeʻa ʻelua; he mau keiki piha ʻike i aʻo ʻia e ko lāua kupuna wahine ʻo Kauluhenuihihikoloiuka.

     No laila, ua hele ʻo Hanakahi i mua o nā keiki malihini ʻelua me ka hōʻike i kona manaʻo e hoʻāikāne me lāua. Hōʻole ʻo Kamiki i ko Hanakahi manaʻo me ke koi pū iā ia e hoʻāikāne lāua me ia ma hope o ko lāua hoʻopāpā ʻana me ia. ʻO ko Kamiki kumu o ka ʻōlelo ʻana pēlā, ʻo ia hoʻi, makemake ʻo ia e hoʻāikāne ma hope o ka ʻike ʻana i ka nui o ke aho a me ka ikaika i loaʻa iā Hanakahi, a laila, e hoʻāikāne lāua me ia, no ka mea, ʻo ia ka hana koa kūpono.

I ka hopena, hoʻopāpā ʻo Hanakahi me Kamiki lāua ʻo Makaʻiole.  Kuʻupau ʻo ia i kona aho ma luna o nā ʻai a ka uʻi. Kuʻupau ʻo ia i ka holo, ke kuʻi, ka pahu, ka nou, a me ka mokomoko pū kekahi. I ka hopena nō naʻe, ua eo ka lanakila i nā keiki hoʻopāpā o Kona Kai ʻŌpua i ka Laʻi. E like pū me ka mea i hoʻohiki ʻia, ua hoʻāikāne ʻo Kamiki lāua ʻo Makaʻiole me Hanakahi, a ua lilo ʻo Hanakahi ʻo ia ke kaulana ʻāina i noʻonoʻo nui a kālailai i kāna mau hana ma mua o ka lele koke ʻana a loaʻa ka hopena maikaʻi ʻole.