Ka Hoʻoilina a Keʻelikōlani

Ka Palapala Hoʻoilina a R. Keʻelikōlani

Ko Hawaii Pae Aina, 13 ʻOkakopa 1883

Hōʻano hou ʻia na Kamalani M. F. H. Johnson

ʻO wau ʻo Ruth Keʻelikōlani e noho nei me ka manaʻo pono a no koʻu makemake, ʻoiai ke Akua, ua kōkua mai iaʻu i ka manaʻo maopopo; a no koʻu makemake hoʻi e kauoha aku i ke ʻano o ka hoʻoponopono ʻana i koʻu waiwai ma hope aku o koʻu make ʻana. No laila, ke hana nei au a ke hoʻolaha, a ke hoʻākāka nei hoʻi au i kēia palapala kauoha hoʻoilina hope loa aʻu.

Ke kauoha aku ne iau e hoʻokuʻu ʻia koʻu mau ʻaiʻē pono a pau, ʻo koʻu mau hoʻokō kauoha i hōʻike ʻia ma lalo nei, mai loko aʻe o koʻu waiwai i ka wā kūpono iā lākou, ma hope iho o koʻu make ʻana.

Ke hāʻawi, a ke hoʻolilo loa aku nei au no kuʻu kaikaina i aloha nui ʻia, Bernice Pauahi Bishop, i koʻu mau waiwai a pau loa, nā waiwai a pau, a me nā waiwai lewa mai Hawaiʻi a Kauaʻi, nona ia mau waiwai a pau loa.

Ke hāʻawi aku nei au iā Pūkuʻi K, i ke ahupuaʻa ʻo Honokāne ma Kohala, Hawaiʻi no kona wā ola.

Ke hāʻawi aku nei au iā Kaʻaeʻa W, i ke ahupuaʻa ʻo Pāhoa, ma Lahaina, Maui, no kona wā ola.

Ke hāʻawi aku nei au iā Kapule W, i kēlā hapa o ka ʻili ʻo Wailuakiʻo ma Pālama, āna e noho nei i kēia wā no kona wā ola.

Ke hāʻawi aku nei au iā Kahaunaele W, i ka ʻili ʻāina ʻo Paeʻaki, ma Pālama, Oʻahu, no kona wā ola, a ke kauoha nei nō hoʻi au, e uku ʻia ʻo ia i kona wā ola, i kanalima kālā, ($50.00) i kēlā a me kēia māhina a ke hāʻawi nei au iā ia i hoʻokahi kaʻa hale a me hoʻokahi lio, ʻo ia ʻo Kulaliʻi.

Ke hāʻawi aku nei au iā Kapoli Kamakau W, i koʻu pā hale ma ke Alanui Mōʻīwahine, ʻo ia hoʻi ka pā i ʻōlelo ʻia no Nāmanu iā Kekūanāoʻa, a me kēlā ʻāpana ʻāina i kapa ʻia ʻo Kualau kokoke i kahi o Keo Kaʻaka nona ia no kona wā ola.

Ke hāʻawi aku nei au iā Palakaluhi K, a me kāna wahine, i kēlā mau ʻāpana ʻāina ʻelua i ana ʻia no lāua ma Kauluwela; pā hale 1 12 ʻeka, a me ʻeono loʻi 1 5-8 ʻeka no ko lāua wā ola.

Ke hāʻawi aku nei au iā Keaka Kaholoaumōʻī, i hoʻokahi kaʻa ukana a me nā lio ʻelua “Wailele a me lio ʻUlaʻula.”

ʻO kēia mau ʻāina a ʻāpana ʻāina a pau i hāʻawi ʻia ma luna nei no kekahi mau mea no ka manawa, ʻoiai lākou e ola ana, e hoʻi hou nō ke make lākou, a ʻo kekahi paha o lākou, i kuʻu kaikaina i aloha nui ʻia, iā Bernice Pauahi Bishop, e like me kaʻu kauoha mua ma luna iho nei.

Ke koho aku nei au iā Charles R. Bishop, a me Rudolph Meyer, i mau mea hoʻokō o kēia palapala kauoha hope loa aʻu.

R. Keʻelikōlani

Nā Hōʻike

Alexander Mackintosh;

Thomas Brown