Ke Aliʻi Kiʻekiʻe Ruth Keʻelikōlani! Ua hala! Ua nalo!
Ke Aliʻi Kiʻekiʻe Ruth Keʻelikōlani
Ua hala! Ua nalo!
Hōʻano hou ʻia na Kamalani M. F. H. Johnson
Eia ma luna o ko mākou hōkua e Hawaiʻi, ke hāʻawe aku nei e hōʻikeʻike aku i ka hala ʻana, lele ke aho, a moe ʻoni ʻole ʻo ka Pua Aliʻi Kiʻekiʻe pili ponoʻī o ko Kamehameha Hale. He ukana luʻuluʻu, walania, aweawe a lihaliha nānā iwikuamoʻo o kēia lāhui e kaniʻuhū iho ai. Ua pio ke kukui o ko ke Aliʻi Nui Keʻelikōlani hale; ua pūanuanu ka home o nā Kamehameha; a ua nele ka lāhui i ke Aliʻi Kiʻekiʻe mai ka pāpū Aliʻi kūkahi kahiko o kēia pae moku. ʻO ia ke Aliʻi kahiko aku i ko nā Aliʻi ʻē aʻe a pau, ʻoiai ʻo ia e ola ana; a i kona make ʻana, ua koe ihola kona pōkiʻi Aliʻi Pauahi Pīhopa.
Ua loaʻa ʻo ia i ka maʻi pīwa, a no nā lā he 11 wale nō, a hāʻule akula. Ua hui kēia ʻano maʻi pīwa me kona maʻi kahiko, wahi a ka hōʻike a nā kauka, e pili ana i kona puʻuwai; a no ka loaʻa ʻole o ka lāʻau kūpono e hoʻopau koke ʻia ai kēia ʻano pīwa, ua hui maila kēlā ʻano maʻi mua a ikaika lua aʻela ka hana a ka maʻi, e kinai ana i kona ola.
Ua ʻōlelo ʻia, ua loaʻa nō kēia maʻi iā ia ma muli o kona mālama pono ʻole iā ia iho, ʻoiai, ua hoʻi mai ʻo ia mai Holualoa mai, mai ka holo kaʻa ʻana. A i ka hiki ʻana mai i Kona Hema, ua wela loa ʻo ia, a me ia wela nō kā, hele akula i ka ʻauʻau kai. A pau ka ʻauʻau ʻana, hoʻi i kula a komo i ke kapa lahilahi, a noho hou aku nō i mua o nā aheahe makani mālie o ua ʻāina pohu lā. A i ka hoʻi ʻana aku i kahi moe, ua piʻi maila ke anu ʻaʻole o kana mai, noke akula i ka hoʻouhi i ke kapa, ʻaʻohe wahi mehana i loaʻa. A hoʻopumehana maoli ʻia me ka wai mehana, a ma hope aku o ka loaʻa ʻana o ka pumehana, ua piʻi nui maila ka wela, a ʻoi loa aku i ka mea kūpono, a pēlā nō hoʻi ke anu i piʻi hou ai a nui loa.
Ua inu ʻo ia i ka ʻaila no ka hoʻonohā ʻana, a ua nohā ʻo ia a ʻoi aku i ka mea kūpono. Pēlā i hiki mai ai ka lono i Honolulu nei, a i loaʻa ai he kumu e holo aku ai nā aliʻi, ka Mōʻīwahine Kaleleonālani, a me kona hoahānau ke Aliʻi Pauahi, ma muli o ia lono hoʻopūʻiwa, a ʻo ka Mōʻī paha kekahi ma ia huakaʻi.
Ma ka hola 10 o ka pō Poʻakolu Mei 23, ua hālāwai pū nā aliʻi me ke aliʻi maʻi; a ma ka ʻike aku a nā aliʻi malihini, he maikaʻi nō kona ola e make ʻole ai, akā, ma ka hola 9 o ke kakahiaka o ka lā 24 aʻe, ua haʻalele maila ʻo ia i kona kaikaina a me kona kaikoʻeke, e paʻiāuma aku ana nona, a me nā ʻōhua pū. Aloha ʻino.
Ua lele loa aʻe ke aho o ke Aliʻi ma kona Hale i kapa ʻia ka “Haleʻōlelo” ma ka pā o Huliheʻe. Aloha wale ʻo ia.
Huli haliu Kawaikini a Kāne
E hākoʻi ana i ke alo o Waiʻaleʻale
Ke kumu aku ia o ke anu o
Maunahina––a––
A Maunahina, huki aʻela nā peʻa hala o Puna, huki aʻela Kalalea, ka paia hala makani:
Lele pueo ka ʻalihi wai o Koʻolau
ʻO ke poʻo wai ia o Hanalei nui
ʻAʻohe amoamo o Hīhīmanu
Ua like a like nō me Limunui
Ua manaʻo ʻia, ua hānau ʻia ke Aliʻi, ka Mea Kiʻekiʻe Keʻelikōlani i ka MH 1826, mai loko mai o ke Aliʻi Pauahi (W), ke kaikamahine a Kaʻōleiokū (K), keiki a Kamehameha I, ke keiki a Keōua (K), ke keiki a Keʻeaumoku (K), ke keiki a Keaweikekahialiʻiokamoku. He Keawe ʻo ia, he Kamalalawalu, a he Kākuhihewa. He Kamehameha ʻo ia ma ka lālani pololei.
Ma Honolulu nei nō ʻo ia i hānau ʻia ai, aia i ke kahua e kū nei ka Hōkele Hawaiʻi kona one hānau. Ua manaʻo ʻia, ua male ʻia lāua me ke Aliʻi Leleiōhoku i ka MH 1839, a ua hānau ʻo ia i kāna hiapo i ke Keiki Aliʻi Kīnaʻu i ka MH 1841, a i ʻole, 1842. A ma ka MH 1848, make akula kāna aliʻi kāne.
I ka MH 1856, male hou ʻo ia i ke kāne hope ʻo ia ʻo ʻAikake Davis. I ka MH 1859, make akula ʻo Kīnaʻu kāna keiki.
He hoʻoilina ʻo ia no nā waiwai nui o kona mau hoahānau Kamehameha IV me Kamehameha V, a ua waiho iho ʻo ia i kēia mau waiwai nui i kona hoʻoilina i koho ai, ʻo ia kona kaikaina Pauahi Pīhopa. Penei ko lāua pili ʻana:
Na Kamehameha I he keiki ʻo Kaʻōleiokū; na Kaʻōleiokū me Kahailiʻōpua ke kaikamahine ʻo Konia (W); na Konia ke kaikamahine ʻo Pauahi Pīhopa e ola nei. ʻAʻole o lāua wehena. ʻAʻole mea hoʻopaʻapaʻa i ko lāu[a] pili ʻana.
Ke waiho nei ke kino māloʻeloʻe ʻoni ʻole o ke Aliʻi ma loko o kona home nani ma Kaʻakopua, alanui Emma, a ua haiamū ʻia ia wahi e nā aliʻi. Ua lohe mai mākou, ʻo ka lā 17 o Iune nei ka lā e mānele ʻia ai kona kino make a waiho i kahi i manaʻo ʻia no ka hoʻomaha hope loa ʻana.
Ua pau ka hoʻopūnana ʻana a kona home nani i kona kino ʻuhane; ua nalo kona mau hiʻohiʻona mai nā kaiaulu ʻolu o Keoneʻula; ua pau ka pā ʻana o nā ʻehukai o nā Kona i kona ʻili aliʻi; ua hala ke au o nā lau niu me nā lau loulu e ani peʻahi ai i kona hōʻea ʻana aku; ua nalo kona leo mai ka lohe ʻana a nā pepeiao o kona mau ʻaialo; na haʻi aku e pāpahi nā lau liko o ia mau uka; na kahi aʻe hoʻi e walea ka nohona o kona mau home i aloha ai; e haʻohaʻo ana nā ʻēheu Kēhau kololio o ka wehe kaiao o Kailua; ua pau ka ʻeha ʻana o ka ʻili lepo o ke alaloa o Kahelo i nā huila o kona kaʻa; ua nalo ʻo Kamakahonu mai ka ʻikena a kona mau maka; a ua pau nā hōʻoluʻolu ʻana a ke kūʻono laʻi ʻo Keauhou i kona kino; ua pau, ua hala, ua hoʻi akula ʻo ia ma ʻō; i kahi a Kaʻahumanu mā i hoʻi mua ai; ua kuʻu kona mau ʻōmaʻimaʻi ʻana, ua palekana, ua neʻeneʻe akula a hoʻokokoke aku ma lalo o nā kapuaʻi o ka Mōʻī o nā Mōʻī.
ʻIke iā Kaʻū nā wāhine, he Kaʻū ka makani
He umauma i pā ʻia e ka Moaʻe
E ka Unulau, ʻo Maka o Unulau
Inā aku nō lā i Unulau
Ka wahine kāʻili pua o Paiahaʻa
Hahai, alualu, pua hala
O Kamilo pae kanaka ē––
He kanaka ke koa no ka ʻehu ahiahi
ʻO ia nei hoʻi ko ka ʻehu kakahiaka
ʻO māua nō me ka makua o kākou. Ua ʻike–a.