Search
  • Kamalani Johnson

No Keʻelikōlani, Muʻolaulani Ka Inoa

W. L. Moehonua, Ka Hoku o ka Pakipika, 7 Mei 1863, Puke 2, Helu 39


Hōʻano hou ʻia na Kamalani M. F. H. Johnson


No Keʻelikōlani, Muʻolaulani Ka Inoa


He anana lā i ka loa o Alakaʻi

Ke kuhi lā, he koke aku ʻo Maunahina

He liʻuliʻu Waiʻaleʻale a ke a–nu

He anu ka nahele ʻo ʻAipō

ʻO ke kūpilikiʻi akula hina i Maunahina–

Hina i ka honua lama a ke aloha

I ka ʻaʻe hākōkō a ka manaʻo

E pilia lā i ka moe he kanaka i–a

He kanaka ia ua helu ʻia ka malama

Hana ʻia iho i mio kou aloha ʻi–a.


na Lilipi

ʻO wau e hele i ka papa ʻo Āpua

Ke kahi lā he ʻale wai ko Maukele

He pali mai hoʻi, Hōlei na ka u–a

He ua kā ka waimaka e kulu nei

He milimili hoʻi ka loko o kuʻu aloha ʻe–ā

Aloha i ka liko ʻōhiʻa o Puʻulena

I ke ea hanu i nā makani kā ʻolua

Ua loa Kauonahunahu i ke a–nu

E anu lā i ka nui o ke aloha

Ua pelepulu ua mauna i ka manaʻo ʻe–ā


na Kekūhaupiʻo



ʻO wau e hele i ka nahele ʻŌlaʻa

E keʻa mai ana ke anu i Kahoʻokū

He lipo aku iā Nākiakāu–nu

Ke kāunu hewa ia lā koʻu inoa

Eia iho nō ka ʻewaiki ke noho lā ʻe–ā

Aloha i ka hāʻoʻeoʻe lehua a ka wahine

Ua kuhi ʻŌmaʻolala he ua ʻawaʻawa–ē

A ʻawaʻawa kā ia i ke aloha

Nāu liʻa a wali ke oka a ka makemake

E ʻapu hoʻokahi i nahā ma waho ʻe–ā


na Kapakiʻi

Hele alo i ka ua Kīpuʻupuʻu

ʻEʻelekoa malana i ʻŌuli

He anu mai hoʻi Waimea na ka u–a

He ua ke Kahiki i Lanimaomao

ʻO ka paheʻe akula hina i Mahiki ʻe–ā

Mai lilo i ka helekua a kuʻu manaʻo

I ke kau o ka haili moe he kanaka

E pili nō māua i Waialoha ē

Kainoa, ua ʻōuli ē ke aloha

Eia nō kā i loko me ka manaʻo ʻe–ā


na Kelewaikū

11 views0 comments